गोवा प्रोफेशन लीग फुटबॉल स्पर्धेत कळंगुटला सेझा अकादमीने रोखले
पणजी : गोवा प्रोफेशन लीग फुटबॉल स्पर्धेत मंगळवारी सेझा फुटबॉल अकादमीने सुधारित खेळ करत कळंगुट असोसिएशनला गोलशून्य बरोबरीत रोखले. त्यामुळे दोन्ही संघांना प्रत्येकी एक गुण मिळाला.
म्हापसा येथील धुळेर स्टेडियमवर सामना झाला. मागील लढतीत धेंपो क्लबला पराजित केलेल्या कळंगुट असोसिएशनने मंगळवारी सेझा अकादमीचा बचाव भेदता आला नाही. सलग चार सामने अपराजित असलेल्या कळंगुट असोसिएशनने आता स्पर्धेत 13 गुण झाले आहेत. ओळीने तीन सामने जिंकल्यानंतर त्यांची ही पहिली बरोबरी ठरली. सेझा अकादमीची सलग दुसरी बरोबरी ठरली, त्यांचे आता तीन गुण झाले आहेत.
सामन्याच्या पूर्वार्धात सेझा अकादमीस गोल करण्याच्या संधी होत्या, मायरन बोर्जिस आणि रिझबॉन फर्नांडिस चेंडूला अचूक दिशा दाखवू शकले नाहीत. सेझा अकादमीचा गोलरक्षक सपन याची कामगिरीही उल्लेखनीय ठरली. त्याने कळंगुटच्या सिद्धांत शिरोडकरचा फटका रोखला, तसेच निक्सन कास्ताना याचा फ्रीकिक फटकाही उधळून लावला. उत्तरार्धात सिद्धांतचा आणखी एक प्रयत्न गोलरक्षक सपनने अडविल्यामुळे कळंगुटला आघाडी घेता आली नाही. सामन्याच्या इंज्युरी टाईममध्ये सेझा अकादमीच्या कुणाल साळगावकर याचा प्रयत्न कळंगुटचा गोलरक्षक परमवीर याने अडविल्यामुळे गोलशून्य बरोबरीची कोंडी कायम राहिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.