ISL football: ओडिशा एफसीवर दोन गोलने मात
ISL footballDainik Gomantak

ISL football: ओडिशा एफसीवर दोन गोलने मात

आयएसएल स्पर्धेत पहिला वैयक्तिक गोल केल्यानंतर आनंद व्यक्त करताना केरळा ब्लास्टर्सचा हरमनज्योत खब्रा.

पणजी: केरळा ब्लास्टर्सने इंडियन सुपर लीग (आयएसएल) फुटबॉल स्पर्धेच्या (Football) आठव्या मोसमात अव्वल स्थान प्राप्त करताना ओडिशा एफसीवर 2-0 फरकाने मात केली. वास्को येथील टिळक मैदानावर बुधवारी झालेल्या लढतीतील दोन्ही गोल पूर्वार्धात झाले.

सलग 10 सामने अपराजित असलेल्या केरळा ब्लास्टर्सचा हा एकूण 11 लढतीतील पाचवा विजय ठरला. त्यांचे आता 20 गुण झाले असून त्यांनी 10 गुण असलेल्या जमशेदपूर एफसीला दुसऱ्या स्थानी लोटले.

ISL football
IND VS SA: विराट कोहलीचे कॅचचे 'शतक' पूर्ण, सुनील गावस्करचा सलाम

10 लढतीत एकही पराभव न पत्करता इव्हान व्हुकोमानोविच यांच्या मार्गदर्शनाखालील संघाने प्रत्येकी 5 विजय व बरोबरी नोंदविल्या आहेत. ओडिशा एफसीला पाचवा पराभव पत्करावा लागला. त्यामुळे 10 लढतीनंतर किको रमिरेझ यांच्या मार्गदर्शनाखालील संघाचे 13 गुण व आठवा क्रमांक कायम राहिला.

निशू कुमार याने 28व्या मिनिटास केरळा ब्लास्टर्सचे गोलखाते उघडल्यानंतर हरमनज्योत खब्रा याने हेडिंगद्वारे 40व्या मिनिटास संघाची आघाडी वाढविली. केरळा ब्लास्टर्सचा हा ओडिशावरील सलग दुसरा विजय ठरला. पहिल्या टप्प्यातही केरळच्या संघाने 2-1 फरकाने विजय नोंदविला होता.

केरळा ब्लास्टर्सचे वर्चस्व

पूर्वार्धातील खेळात दोन गोल नोंदवून केरळा ब्लास्टर्सने वर्चस्व प्रस्थापित केले. नियमित कर्णधार जेसेल कार्नेरो दुखापतग्रस्त असल्याने संघात पुनरागमन केलेला बचावपटू निशू कुमार याने केरळा ब्लास्टर्सला आघाडी मिळवून दिली. एड्रियन लूना याच्या असिस्टवर 24 वर्षीय निशूने दूरवरून सणसणीत फटक्यावर ओडिशाचा गोलरक्षक अर्शदीप सिंग याला हतबल ठरविले.

विश्रांतीला पाच मिनिटे असताना हरमनज्योत खब्रा याने आयएसएल कारकिर्दीतील पहिला गोल केला. त्यामुळे केरळच्या संघापाशी दोन गोलची आघाडी जमा झाली. लूना याच्या कॉर्नर फटक्यावर खब्रा याचे हेडिंग भेदक ठरले. या 33 वर्षीय खेळाडूचा 112 आयएसएल सामन्यातील हा पहिलाच गोल ठरला.

ISL football
सूरज लोटलीकर यांच्यावर बीसीसीआयची महत्त्वाची जबाबदारी

प्ले-मेकर लूना प्रभावी

केरळा ब्लास्टर्सचा प्ले-मेकर मध्यरक्षक एड्रियन लूना याने पुन्हा एकदा प्रभावी खेळ करून छाप पाडली. ओडिशाविरुद्ध दोन्ही गोल त्याच्या असिस्टवर झाले. उरुग्वेच्या या 29 वर्षीय खेळाडूचा आयएसएलमधील पहिलाच मोसम आहे. त्याने 11 सामन्यात 3 असिस्ट नोंदवून मुंबई सिटीच्या अहमद जाहू व जमशेदपूरचा ग्रेग स्टुअर्ट यांना गाठले आहे. शिवाय लूना याने 2 गोलही केले आहेत.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
www.dainikgomantak.com