Team India वर बसतोय 'चोकर्स'चा शिक्का! गेल्या दहा वर्षातील तब्बल 15 ICC स्पर्धाच आहेत पुरावा

Team India in ICC Tournaments: दक्षिण आफ्रिकेत सध्या महिला टी20 वर्ल्डकप 2023 स्पर्धा खेळवली जात आहे. या स्पर्धेतील उपांत्य सामना गुरुवारी भारत विरुद्ध ऑस्ट्रेलिया महिला संघात झाला. या सामन्यात ऑस्ट्रेलिया महिला संघाने 5 धावांनी विजय मिळवून सलग सातव्यांदा अंतिम सामन्यात प्रवेश केला.

पण या पराभवामुळे भारतीय वरिष्ठ महिला संघाचे पुन्हा एकदा आयसीसी विजेतेपद जिंकण्याचे स्वप्न भंगले. भारतीय महिला संघाने 2020 साली झालेल्या टी20 वर्ल्डकपमध्येही अंतिम सामन्यात प्रवेश केला होता. पण त्यावेळीही त्यांना अंतिम सामन्यात ऑस्ट्रेलियाने मात दिली होती.

दरम्यान, गेल्या 10 वर्षात भारताच्या महिला आणि पुरुष वरिष्ठ संघांना आयसीसी स्पर्धांचे एकही विजेतेपद जिंकता आलेले नाही. गेल्या 10 वर्षात अनेकदा भारताच्या महिला आणि पुरुष दोन्ही संघांनी बाद फेरींमध्ये प्रवेश केला आहे. मात्र, विजेतेपद मिळवण्यात अपयश आले आहे.

भारताच्या वरिष्ठ संघाने अखेरच्या वेळी आयसीसी स्पर्धेचे विजेतेपद 2013 साली मिळवले होते. त्यावेळी एमएस धोनीच्या नेतृत्वाखाली भारतीय संघाने इंग्लंडमध्ये झालेली चॅम्पियन्स ट्रॉफी जिंकली होती.

त्यानंतर भारताच्या महिला आणि पुरुष संघाने मिळून तब्बल 15 आयसीसी स्पर्धा खेळल्या, ज्यामध्ये विजेतेपद मिळवण्यात अपयश आले. या 15 स्पर्धांपैकी भारतीय संघाने 11 वेळा बाद फेरीत प्रवेश केला. मात्र, त्यातील एकाही स्पर्धेत भारतीय संघाला विजेतेपद मिळवता आले नाही. त्यामुळे आता भारतीय संघ चोकर्स ठरत असल्याची चर्चाही क्रिकेट चाहत्यांमध्ये सुरू झाली आहे.

दरम्यान, भारतीय वरिष्ठ संघाला जरी आयसीसीचे विजेतेपद गेल्या 10 वर्षात मिळवता आलेले नसले, तरी 19 वर्षांखालील संघाने वर्ल्डकप जिंकले आहेत. नुकतेच याचवर्षी जानेवारीच्या अखेरीस 19 वर्षांखालील भारतीय महिला संघाने वर्ल्डकप विजेतेपद जिंकले होते.

गेल्या 10 वर्षातील भारतीय वरिष्ठ संघाची आयसीसी स्पर्धेतील कामगिरी

2014 - पुरुष टी20 वर्ल्डकप (उपविजेते)

2014 - महिला टी20 वर्ल्डकप (साखळी फेरीत बाद)

2015 - पुरुष वनडे वर्ल्डकप (उपांत्य सामन्यात पराभूत)

2016 - पुरुष टी20 वर्ल्डकप (उपांत्य सामन्यात पराभूत)

2016 - महिला टी20 वर्ल्डकप (साखळी फेरीत बाद)

2017 - महिला वनडे वर्ल्डकप (उपविजेते)

2017 - चॅम्पियन्स ट्रॉफी (उपविजेते)

2018 - महिला टी20 वर्ल्डकप (उपांत्य सामन्यात पराभूत)

2019 - पुरुष वनडे वर्ल्डकप (उपांत्य सामन्यात पराभूत)

2020 - महिला टी20 वर्ल्डकप (उपविजेते)

2021 - जागतिक कसोटी अजिंक्यपद स्पर्धा (उपविजेते)

2021 - पुरुष टी20 वर्ल्डकप (साखळी फेरीत बाद)

2022 - महिला वनडे वर्ल्डकप (साखळी फेरीत बाद)

2022 - पुरुष टी20 वर्ल्डकप (उपांत्य सामन्यात पराभूत)

2023 - महिला टी20 वर्ल्डकप (उपांत्य सामन्यात पराभूत)

(2022 साली भारतीय महिला संघाला राष्ट्रकुल स्पर्धेच्या अंतिम सामन्यातही पराभूत व्हावे लागले होते. त्यामुळे भारतीय महिला संघाने रौप्य पदक जिंकले होते.)