स्पर्धेला १४ दिवस असताना आयपीएलचे वेळापत्रक जाहीर
मुंबई: ,बहुप्रतिक्षेत असलेले आयपीएल-२०२० चे वेळापत्रक अखेर स्पर्धेला १४ दिवस शिल्लक असताना जाहीर करण्यात आले. प्रथेनुसार गतविजेते आणि उपविजेते अनुक्रमे मुंबई इंडियन्स आणि चेन्नई सुपरकिंग्ज यांच्यातच सलामीचा बार उडणार आहे.
सर्व अडथळ्यांची शर्यत पार करून वेळापत्रक तयार करण्यात बीसीसीआयला अखेर यश आले. १९ सप्टेंबर ते ३ नोव्हेंबर या कालावधीत ५६ साखळी सामने होतील, त्यानंतर प्लेऑफच्या लढती होतील. प्लेऑफचे वेळापत्रक नंतर जाहीर होईल.
आयपीएलचे सर्व आठही संघ अमिरातीत दाखल झाल्यावर वेळापत्रक जाहीर होणे अपेक्षित होते; परंतु चेन्नई संघातील १३ सदस्यांना कोरोनाची लागण झाली. त्यामुळे त्यांना सराव करता आला नव्हता. परिणामी चेन्नई संघाला काही दिवस सरावासाठी मिळण्याकरिता त्यांच्या लढती उशिराने सुरू करण्याची चर्चा होती; परंतु महेंद्रसिंग धोनीच्या चेन्नई संघाने काही दिवसांच्या सरावत आपण सज्ज होऊ, असा संदेश दिल्यानंतर वेळापत्रकाचा अडथळा पार झाला.
रोहितचा शब्द खरा ठरणार
महेंद्रसिंग धोनीने आंतरराष्ट्रीय क्रिकेटमधून निवृत्ती जाहीर केल्यावर मुंबई इंडियन्सचा कर्णधार रोहित शर्माने धोनीच्या कारकिर्दीचा गौरव करताना १९ सप्टेंबरला टॉससाठी भेटू, असे ट्विट केले होते. रोहितचा हा शब्द आता खरा ठरणार आहे.
दृष्टिक्षेपात आयपीएल २०२०
आयपीएल २०२० वेळापत्रक
