ISL Football: बरोबरीमुळे एफसी गोवाने दोन गुण गमावले; नॉर्थईस्ट युनायटेडची पेनल्टी गोलमुळे बरोबरी

एफसी गोवा सहाव्या स्थानी
NorthEast United FC Vs FC Goa
NorthEast United FC Vs FC GoaDainik Gomantak

ISL Football: नॉर्थईस्ट युनायटेडचा कोलंबियन खेळाडू विल्मार जॉर्डन गिल याने दोन वेळा पेनल्टी फटक्यांवर अचूक नेम साधला, त्यामुळे इंडियन सुपर लीग (आयएसएल) फुटबॉल स्पर्धेत एफसी गोवा संघाला दोन गुणांचे नुकसान सहन करावे लागले. गुवाहाटी येथे रविवारी झालेला सामना 2-2 असा गोलबरोबरीत राहिला.

एदू बेदिया याच्या गोलमुळे एफसी गोवाने 31व्या मिनिटास आघाडी मिळविली. मात्र 45+3व्या मिनिटास जॉर्डन याने पेनल्टी फटक्याचा नेम चुकविला नाही. त्यामुळे स्थानिक संघाने 1-1 अशी गोलबरोबरी साधली. उत्तरार्धात एफसी गोवा संघाला पेनल्टी फटका मिळाला. यावेळी स्पॅनिश खेळाडू इकेर ग्वोर्रोचेना याने गोव्यातील संघाला पुन्हा आघाडीवर नेले. सामन्यातील वीस मिनिटे शिल्लक असताना नॉर्थईस्ट युनायटेडला सामन्यातील दुसरा पेनल्टी फटका मिळाला. 71व्या मिनिटासही जॉर्डन याचा नेम पुन्हा अचूक ठरला. इंज्युरी टाईमच्या अखेरच्या मिनिटास ब्रायसन फर्नांडिसने चेंडूला गोलनेटची दिशा दाखविली होती, पण तो प्रयत्न ऑफसाईड ठरल्यामुळे एफसी गोवास एका गुणावर समाधान मानावे लागले.

NorthEast United FC Vs FC Goa
Argentina Football: जगज्जेत्या अर्जेंटिनावर होणार FIFA कडून कारवाई, 'या' आरोपांची मिळणार शिक्षा

एफसी गोवा सहाव्या स्थानी

एफसी गोवाची ही स्पर्धेतील दुसरी बरोबरी ठरली. त्यामुळे 14 लढतीनंतर 20 गुणांसह ते सहाव्या क्रमांकावर कायम राहिले. पाचव्या क्रमांकावरील ओडिशा एफसीपेक्षा त्यांचे दोन गुण कमी आहेत. एफसी गोवाचा पुढील सामना येत्या रविवारी (ता. 22) फातोर्डा येथे केरळा ब्लास्टर्सविरुद्ध होईल. स्पर्धेतील चार लढतीत त्यांना फक्त दोनच गुण मिळविता आले आहेत. नॉर्थईस्ट युनायटेडची ही पहिलीच बरोबरी ठरली. 14 लढतीनंतर त्यांचे चार गुण झाले असून तळाचे अकरावे स्थान कायम आहे.

शंभराव्या लढतीत एदूचा गोल

आयएसएल स्पर्धेत शंभरावा सामना खेळताना एफसी गोवाच्या एदू बेदिया याने गोल केला. तो यंदा सलग सहावा मोसम खेळत आहे. ब्रँडन फर्नांडिसच्या पासवर एदू याने डाव्या पायाच्या व्हॉली फटक्यावर नॉर्थईस्टचा गोलरक्षक मिर्षाद मिचू याला चकविले. या ३३ स्पॅनिश मध्यरक्षकाने आता यंदा स्पर्धेत तीन, तर एकंदरीत 13 आयएसएल गोल केले आहेत.

NorthEast United FC Vs FC Goa
Khashaba Dadasaheb: गूगलने खास डूडल शेअर करत कुस्तीगीर खाशाबा जाधव यांची 97 वी साजरी केली जयंती

पेनल्टी गोलचे वर्चस्व

विश्रांतीपूर्वी नॉर्थईस्टच्या एमिल बेनी याच्या कॉर्नर फटक्यावर ॲलेक्स साजी याचा फटका रोखण्याच्या प्रयत्नात चेंडू एफसी गोवाच्या ब्रँडन फर्नांडिसच्या हाती लागला. त्यामुळे रेफरीने पेनल्टी खूण केली व जॉर्डन याने यजमान संघाला बरोबरी साधून दिली. तासाभराच्या खेळानंतर एफसी गोवाच्या नोआ सदावी याने नॉर्थईस्टच्या गोलरिंगणात जोरदार मुसंडी मारली असता गोलरक्षक मिर्षाद याने त्याला पाडले. यावेळी पेनल्टी फटक्यावर ग्वोर्रोचेना याने मोसमातील वैयक्तिक सहावा गोल नोंदविला. त्यानंतर नॉर्थईस्टच्या प्रग्यान गोगोई याने एफसी गोवाच्या महंमद फारेस अर्नौट याला गुंगारा देण्याचा प्रयत्न केला, पण त्याला पाडण्यात आले. यावेळी रेफरीने सामन्यात दुसऱ्यांदा नॉर्थईस्टला पेनल्टी फटका दिला. यावेळसही जॉर्डन याने एफसी गोवाचा गोलरक्षक धीरज मोईरांगथेम याला सहजपणे चकविले.

दृष्टिक्षेपात...

- एफसी गोवा व नॉर्थईस्ट युनायटेड यांच्यातील आयएसएल स्पर्धेत 9 बरोबरी

- एकूण 18 लढती, त्यापैकी एफसी गोवा 6, तर नॉर्थईस्ट 3 सामन्यांत विजयी

- एफसी गोवाचे आता स्पर्धेत 23, तर नॉर्थईस्ट युनायटेडचे 13 गोल

- एफसी गोवा सलग 4 लढती विजयाविना, 2 बरोबरी व 2 पराभव

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
www.dainikgomantak.com