Lucknow crowd's ‘Kohli’ chants when Rohit Sharma Batting: इंडियन प्रीमियर लीग 2023 स्पर्धेत मंगळवारी लखनऊ सुपर जायंट्स विरुद्ध मुंबई इंडियन्स संघात 63 वा सामना झाला. या सामन्यात मुंबईला केवळ 5 धावांनी पराभवाचा सामना करावा लागाला. पण याच सामन्यात एक अनोखी घटना पाहायला मिळाली.
या सामन्यात लखनऊने मुंबईसमोर 178 धावांचे आव्हान ठेवले होते. या आव्हानाचा पाठलाग करताना रोहित शर्मा आणि ईशान किशन या सलामीवीरांनी चांगली सुरुवात केली होती. दरम्यान, ते फलंदाजी करत असताना लखनऊकडून जेव्हा नवीन-उल-हक गोलंदाजीला आला, तेव्हा प्रेक्षकांमधून विराट कोहलीच्या नावाच्या घोषणा दिल्या जात होत्या.
नवीनच्या गोलंदाजीवर ईशान आणि रोहित या दोघांनीही आक्रमक पवित्रा स्विकारला होता. त्यांनी नवीनच्या पहिल्या दोन षटकात 16 धावा काढल्या.
दरम्यान, स्टेडियममध्ये जेव्हा प्रेक्षकांकडून 'कोहली...कोहली...' असे नारे दिले जात होते, त्याचवेळी या डावाच्या पाचव्या षटकात नवीन गोलंदाजी करत असताना रोहितने एका धीम्या गतीच्या चेंडूवर स्क्वेअर लेगच्या दिशेने जवळपास 65 मीटर लांब षटकार मारला. या षटकाराचा व्हिडिओही सध्या व्हायरल होत आहे.
खरंतर 1 मे रोजी आयपीएल 2023 मध्ये लखनऊ सुपर जायंट्स आणि रॉयल चॅलेंजर्स बेंगलोर या संघांमध्ये झालेल्या सामन्यात बेंगोलरचा फलंदाज विराट आणि नवीन यांच्यात वाद झाले होते. त्यांचे वाद सामन्यानंतरही पाहायला मिळाले होते.
तसेच त्याच सामन्यानंतर विराटचे लखनऊचा मार्गदर्शक गौतम गंभीरशीही वाद झालेले. त्याचमुळे अनेकदा विराटच्या चाहत्यांकडून लखनऊच्या सामन्यावेळी स्टेडियममध्ये त्याच्या नावावच्या घोषणा दिल्या जात असल्याचे पाहायला मिळाले आहे.
याच कारणामुळे मंगळवारी झालेल्या सामन्यादरम्यानही नवीनच्या गोलंदाजीवेळी प्रेक्षकांनी विराटच्या नावाच्या घोषणा दिल्याचे म्हटले जात आहे.
दरम्यान रोहित आणि ईशान यांनी सलामीला 90 धावांची भागीदारी केली होती. पण त्यानंतर कोणाला खास काही करता आले नाही. रोहितने 25 चेंडूत 37 धावांची खेळी केली, तसेच ईशानने 39 चेंडूत 59 धावांची अर्धशतकी खेळी केली. पण मुंबईचा डाव 20 षटकात 5 बाद 172 धावांवरच संपला.
महत्त्वाचे म्हणजे मुंबईला अखेरच्या दोन षटकात 30 धावांची गरज होती. त्यावेळी 19 व्या षटकात नवीन विरुद्ध टीम डेव्हिडने 2 षटकार आणि 1 चौकारासह 19 धावा चोपल्या होत्या. मात्र, अखेरच्या षटकात मोहसीन खानने शानदार गोलंदाजी करत 5 धावाच दिल्या. त्यामुळे मुंबईला या सामन्यात पराभवाचा सामना करावा लागला.
तत्पुर्वी या सामन्यात प्रथम फलंदाजी करताना लखनऊकडून मार्कस स्टॉयनिसने 47 चेंडूत 4 चौकार आणि 8 षटकारांसह नाबाद 89 धावा केल्या. तसेच कर्णधार कृणाल पंड्याने 49 धावा केल्या. त्यामुळे लखनऊने 20 षटकात 3 बाद 177 धावा केल्या होत्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
