Women Cricket: गोव्याच्या महिलांनी संधी दवडली; महाराष्‍ट्राचा दोन विकेट राखून निसटता विजय

Women ODI Cricket: सीनियर महिला एकदिवसीय क्रिकेट स्पर्धेतील सामना जिंकण्यासाठी महाराष्ट्रासमोर १४३ धावांचे आव्हान असताना त्यांची सुरवातीस ६ बाद ३८ आणि नंतर ८ बाद ८१ अशी घसरगुंडी उडाली, पण गोव्याला संधी साधता आली नाही. परिणामी त्यांना सामना दोन विकेट राखून गमवावा लागला.

सामना बुधवारी गुवाहाटी येथे झाला. गोव्याची फिरकी गोलंदाज पूर्वा भाईडकर (४-२०) हिने अप्रतिम मारा केला. त्यामुळे महाराष्ट्राचा डाव संकटात सापडला. पूर्वाला चांगला साथ देताना दीक्षा गावडे हिनेही टिच्चून मारा केला, पण गोव्याच्या इतर गोलंदाजांना प्रतिस्पर्ध्यांभोवती पकड घट्ट करता आली नाही.

सायली लोणकर (नाबाद ४०) व उत्कर्षा पवार (नाबाद ३७) यांनी दिलेली झुंजही कौतुकास्पद ठरली. त्यांनी नवव्या विकेटसाठी ८५ चेंडूंत नाबाद ६२ धावांची भागीदारी करून संघाला रोमहर्षक विजय मिळवून दिला.

त्यापूर्वी, सलामीस बढती मिळालेली तनया नाईक हिचे अर्धशतक (५९, १०६ चेंडू, ८ चौकार) आणि तळात दिव्या नाईक (२३) हिने लढविलेली खिंड यामुळे गोव्याला १४२ धावांची मजल मारता आली.

संक्षिप्त धावफलक

गोवा ः ४३.१ षटकांत सर्वबाद १४२ (पूर्वजा वेर्लेकर १, तनया नाईक ५९, सुनंदा येत्रेकर ०, निकिता मळीक ७, संजुला नाईक ११, श्रेया परब ३, पूर्वा भाईडकर ५, विनवी गुरव ८, दिव्या नाईक २३, दीक्षा गावडे २, मेताली गवंडर नाबाद ०, श्रद्धा पोखरकर ३-३३, मुक्ता मगरे २-२२, भक्ती मिरजकर २-२३) पराभूत वि. महाराष्ट्र ः ४७.१ षटकांत ८ बाद १४३ (शिवाली शिंदे १०, सायली लोणकर नाबाद ४०, रसिका शिंदे १२, श्रद्धा पोखरकर १३, उत्कर्षा पवार नाबाद ३७, मेताली गवंडर ८.१-२-२१-१, निकिता मळीक २-०-१०-०, पूर्वा भाईडकर १०-१-२०-४, दीक्षा गावडे १०-१-२८-२, सुनंदा येत्रेकर ५-०-२६-०, श्रेया परब ६-०-११-०, तनया नाईक ५-१-१४-०, संजुला नाईक १-०-९-०).