ISL : हैदराबादची दोन गोलच्या पिछाडीनंतर बरोबरी

गोमन्तक वृत्तसेवा
गुरुवार, 28 जानेवारी 2021

सामन्याच्या अखेरच्या चार मिनिटांत दोन गोल नोंदवून हैदराबाद एफसीने सातव्या इंडियन सुपर लीग (आयएसएल) फुटबॉल स्पर्धेत बंगळूर एफसीला पुन्हा एकदा विजयापासून दूर ठेवले. दोन गोलांची आघाडी घेऊनही माजी विजेत्यांना 2-2 गोलबरोबरीवर समाधान मानावे लागले.

पणजी : सामन्याच्या अखेरच्या चार मिनिटांत दोन गोल नोंदवून हैदराबाद एफसीने सातव्या इंडियन सुपर लीग (आयएसएल) फुटबॉल स्पर्धेत बंगळूर एफसीला पुन्हा एकदा विजयापासून दूर ठेवले. दोन गोलांची आघाडी घेऊनही माजी विजेत्यांना 2-2 गोलबरोबरीवर समाधान मानावे लागले.

सामना गुरुवारी वास्को येथील टिळक मैदानावर झाला. कर्णधार सुनील छेत्रीने नवव्या मिनिटास बंगळूरला आघाडी मिळवून दिली. कोझिकोडच्या 22 वर्षीय लिऑन ऑगस्टिन याने आयएसएल स्पर्धेतील पहिला वैयक्तिक गोल करताना 61व्या मिनिटास बंगळूरला मजबूत स्थिती गाठून दिली. सामन्याच्या 86व्या मिनिटास स्पॅनिश आघाडीपटू आरिदाने सांताना याने हैदराबादची पिछाडी एका गोलने कमी करताना अगदी जवळून अचूक फटका मारला. 90+1व्या मिनिटास बदली खेळाडू स्पॅनिश आघाडीपटू फ्रान सान्डाझा याने हैदराबादला बरोबरी साधून दिली. सांताना सामन्याचा मानकरी ठरला.

एफसी गोवासमोर ईस्ट बंगालचा धोका

बंगळूर मोसमात सलग आठ सामने विजयाविना राहिला. या कालावधीत त्यांनी तीन बरोबरी व पाच पराभव पत्करले आहेत. एकंदरीत 14 लढतीतील त्यांची ही सहावी बरोबरी ठरली. त्यांचे आता 15 गुण झाले आहेत. त्यांना आता सातवा क्रमांक मिळाला आहे. हैदराबादने अपराजित मालिका सहा सामन्यांपर्यंत नेली. त्यांची ही सलग तिसरी बरोबरी ठरली. एकंदरीत 14 लढतीतील सातव्या बरोबरीमुळे त्यांचे 19 गुण झाले असून चौथा क्रमांक कायम आहे.

सेटपिसेसवर बंगळूर एफसीने सामन्याच्या सुरवातीस आघाडी मिळविली. सामना सुरू होऊन नऊ मिनिटे झालेली असताना क्लेटन सिल्वाच्या फ्रीकिकवर कर्णधार सुनील छेत्रीचे पेनल्टी क्षेत्रातील भेदक हेडिंग रोखणे हैदराबादचा गोलरक्षक लक्ष्मीकांत कट्टीमनी याला शक्य झाले नाही. या 36 वर्षीय स्ट्रायकरचा हा मोसमातील पाचवा, तर चार लढतीनंतरचा पहिला गोल ठरला.

तासाभराच्या खेळानंतर 22 वर्षीय आघाडीपटू लिऑन ऑगस्टिन याने बंगळूरची आघाडी वाढविली. यावेळी हैदराबादच्या गचाळ बचावाचे प्रदर्शन घडले. सुनील छेत्रीच्या पासवर एरिक पार्तालूचा फटका हैदराबादच्या खेळाडूस आपटून लिऑनकडे गेला. चेंडूवर ताबा ठेवून कूच केलेल्या लिऑनला रोखण्यासाठी हैदराबादचा एकही खेळाडू नव्हता, त्याचा लाभ उठवत या युवा आघाडीपटूने गोलरक्षक कट्टीमनी याला सहजपणे चकविले.  

दृष्टिक्षेपात...

- सुनील छेत्रीचे मोसमातील 14 लढतीत 5 गोल

- एकंदरीत 88 आयएसएल सामन्यात सुनील छेत्रीचे 44 गोल

- लिऑन ऑगस्टिन याचा यंदा 7 आयएसएल लढतीत 1 गोल

- आरिदाने सांताना याचे मोसमातील 13 सामन्यात 7 गोल, एकंदरीत 27 आयएसएल सामन्यात 16 गोल

- फ्रान सान्डाझा याचा 5 आयएसएल लढतीत 1 गोल

- हैदराबादचे 18 गोल, तर 16 गोल स्वीकारले

- बंगळूरवर 19 गोल, तर त्यांनी केलेले 17 गोल

संबंधित बातम्या