ISL: गतविजेते मुंबई सिटी स्पर्धेबाहेर; केरळा ब्लास्टर्स उपांत्य फेरीत

पणजी: गतविजेते मुंबई सिटी आठव्या इंडियन सुपर लीग (आयएसएल) फुटबॉल स्पर्धेच्या साखळी फेरीतच गारद झाले. शनिवारी रात्री हैदराबाद एफसीने त्यांना 2-1 फरकाने हरविल्यामुळे केरळा ब्लास्टर्स संघ उपांत्य फेरीतील चौथा संघ ठरला. हैदराबादसह जमशेदपूर, एटीके मोहन बागान या संघांनी यापूर्वीच स्पर्धेची प्ले-ऑफ फेरी निश्चित केली आहे. (ISL News Updates)

फातोर्डा येथील पंडित जवाहरलाल नेहरू स्टेडियमवर 19 वर्षीय आघाडीपटू रोहित दानू याने 14व्या मिनिटास हैदराबादचे (Hyderabad) गोलखाते उघडले. नंतर 41व्या मिनिटास ऑस्ट्रेलियन जोएल चिनेजी याने आघाडी भक्कम केली. 76व्या मिनिटास सेनेगलच्या मुर्तदा फालच्या हेडरमुळे मुंबई सिटीची पिछाडी एका गोलने कमी झाली.

हैदराबादचा हा 20 लढतीतील अकरावा विजय ठरला. त्यांचे आता 38 गुण झाले असून जमशेदपूरनंतर (40 गुण) दुसरा क्रमांक मिळाला. एटीके मोहन बागान (ATK Mohun Bagan) (37गुण) तिसऱ्या स्थानी आहे. स्पर्धेतील शेवटचा साखळी सामना जमशेदपूर व एटीके मोहन बागान यांच्यात होईल. त्यानंतर क्रमवारी निश्चित होईल. केरळा ब्लास्टर्स (Kerala Blasters) (33 गुण) रविवारी एफसी गोवाविरुद्ध खेळेल. मुंबई सिटीस 20 लढतीत सातवा पराभव पत्करावा लागला. त्यामुळे 31 गुणांसह ते पाचव्या क्रमांकावर कायम राहिले.