एफसी गोवाच्या सपोर्ट स्टाफमध्ये नवे सदस्य

आझकोरा सहाय्यक मार्गदर्शक, तर डोनेज तंदुरुस्तीविषयक प्रशिक्षक
एफसी गोवाच्या सपोर्ट स्टाफमध्ये नवे सदस्य
New members in FC Goa support staffDainik Gomantak

पणजी : एफसी गोवाने मुख्य प्रशिक्षकपदी कार्लोस पेनया यांची नियुक्ती केल्यानंतर, त्यांच्या सपोर्ट स्टाफमध्ये दोघा नव्या स्पॅनिश सदस्यांना सामावून घेतले. गोर्का आझकोरा सहाय्यक मार्गदर्शक, तर होएल डोनेज तंदुरुस्तीविषयक (स्ट्रेंग्थ अँड कडिंशनिंग) प्रशिक्षक असतील.

व्यावसायिक फुटबॉलपटू या नात्याने 14 मोसम खेळल्यानंतर आझकोरा यांनी प्रशिक्षणातील यूईएफए अ परवाना प्राप्त केला. 2018 मध्ये खेळाडू या नात्याने निवृत्त झाल्यानंतर त्यांनी ॲथलेटिक बिल्बाओ संघाच्या युवा संघासोबत काम केले. खेळाडू कारकिर्दीत ते पाच ला-लिगा, 116 सेगुंडा विभागीय सामने खेळले. यूईएफए कप (युरोपा लीग) स्पर्धेत खेळण्याचा अनुभवही त्यांच्यापाशी आहे.

तंदुरुस्ती विषयातील डोनेज हे तज्ज्ञ आहेत. त्यांच्यापाशी क्रीडा विज्ञानातील पदवी, तसेच एफसी बार्सिलोनातर्फे सांघिक क्रीडा विभागातील उच्च कार्यक्षमता व्यावसायिक पदव्युत्तर पदवीही आहे. शिवाय ते प्रशिक्षणातील यूईएफए अ परवानाधारक आहेत. स्पेनमध्ये बरीच वर्षे त्यांनी तंदुरुस्तीविषयक प्रशिक्षक म्हणून काम केले असून हाँगकाँग प्रीमियर लीगमधील दोन वर्षांचा अनुभवही त्यांच्यापाशी आहे.

योग्य संघात दाखल होतोय : आझकोरा

‘‘मी बिनचूक वेळेस चांगले लोक (स्टाफ, क्लब कर्मचारी, खेळाडू) असलेल्या योग्य संघात दाखल होत आहे. त्यामुळे गोव्यात दाखल होऊन मोसमपूर्व सुरवात करण्यास उत्सुक आहे. मोसम उल्लेखनीय ठरण्याची मला खात्री आहे,’’ अशी प्रतिक्रिया एफसी गोवाशी करार केल्यानंतर आझकोरा यांनी दिली. ‘‘भरपूर अनुभव गाठीशी असलेले गोर्का पक्के व्यावसायिक आहेत. स्पेनमध्ये ते खूप वर्षे उच्चस्तरीय फुटबॉल खेळले असून नेहमीच अभ्यासूवृत्तीने शिकण्यावर त्यांचा भर असतो,’’ असे पेनया यांनी आपल्या सहाय्यकाविषयी सांगितले.

भारताबद्दल जाणून घेण्यास उत्सुक : डोनेज

‘‘भारत देश, संस्कृती, खाद्यसंस्कृती, परंपरा आणि विशेषतः देशातील लोकाबद्दल जाणून घेण्यासाठी मी उत्सुक आहे. या अद्‍भूत देशात मला आणि माझ्या कुटुंबास विस्मयकारक अनुभव प्राप्त होण्याची खात्री बाळगतो,’’ असे डोनेज यांनी सांगितले. मुख्य प्रशिक्षक पेनया यांनी यापूर्वी डोनेज यांच्यासमवेत काम केले आहे. त्यांच्या क्षेत्रातील ते चाणाक्ष व्यावसायिक आहेत. परिपूर्ण असलेले डोनेज खेळाडूंची शारीरिक क्षमता वाढवतील, असा विश्वास पेनया यांनी व्यक्त केला.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
www.dainikgomantak.com