Shahid Afridi: 'मुली या फुलासारख्या...' लेकीचं शाहीनशी लगीन लावल्यानंतर लालाची भावूक पोस्ट

Shahid Afridi: पाकिस्तानचा माजी अष्टपैलू शाहिद आफ्रिदीची सर्वात मोठी मुलगी अंशा हिचा निकाह पाकिस्तानचा युवा वेगवान गोलंदाज शाहीन शाह आफ्रिदीशी झाला आहे. यानंतर शाहिद आफ्रिदीने मुलीसाठी केलेल्या भावूक ट्वीटची चर्चा होत आहे.

शाहीन आणि अंशा यांचा निकाह 3 फेब्रुवारी 2023 रोजी पार पडला. हा सोहळा कराचीमध्ये झाला. त्यांच्या निकाहनंतर 4 फेब्रुवारीला शाहिदने ट्वीट करत अंशा आणि शाहीनला शुभेच्छा दिल्या आहेत.

शाहीदने ट्वीट केले आहे की 'मुली या तुमच्या बागेतील एखाद्या सुंदर फुलासारख्या असतात, कारण मोठ्या आशीर्वादाने फुलतात. मुली या अशा असतात, ज्यांच्याबरोबर तुम्ही तुमच्या हृदयापासून हसता, स्वप्न बघता आणि त्यांच्यावर प्रेम करता. पालक म्हणून मी माझ्या मुलीला निकाहमध्ये शाहीनकडे सोपवले आहे. त्या दोघांनाही शुभेच्छा.' शाहिदच्या या ट्वीटवर अनेक प्रतिक्रिया आल्या आहेत.

शाहिन आणि अंशा यांच्या निकाह सोहळ्यासाठी अनेक आजी-माजी क्रिकेटपटू उपस्थित होते. यात पाकिस्तानचा कर्णधार बाबर आझम, सर्फराज खान, शादाब खान, नसीम शाह अशा अनेक क्रिकेटपटूंचा समावेश होता.

त्यांच्या निकाहचे फोटो आणि व्हिडिओ शाहीन पाकिस्तान सुपर लीगमध्ये खेळत असलेल्या लाहोर कलंदर्स संघाने शेअर केले आहेत. दरम्यान शाहीन १३ फेब्रुवारीपासून सुरू होणाऱ्या पीएसएल 2023 स्पर्धेत लाहोर कलंदर्सकडून खेळताना दिसणार आहे.

शाहीन आणि अंशा यांच्या नात्याची चर्चा गेल्या दोन वर्षांपासून सुरू आहे. हे दोघे विवाहबंधनात अडकणार असल्याच्या चर्चाही बऱ्याच महिन्यांपासून होत होत्या. अखेर त्यांचा निकाह झाल्याने या चर्चांना पूर्णविराम मिळाला आहे.

शाहीन हा पाकिस्तान क्रिकेट संघातील प्रमुख गोलंदाजांपैकी एक आहे. त्याने आत्तापर्यंत 25 कसोटी सामने खेळले असून 99 विकेट्स घेतल्या आहेत. यामध्ये त्याने 11 वेळा एका डावात 4 किंवा त्यापेक्षा अधिक विकेट्स घेतल्या आहेत. तसेच त्याने 32 वनडे सामने खेळले असून 62 विकेट्स घेतल्या आहेत. त्याचबरोबर त्याने 47 आंतरराष्ट्रीय टी20 सामने खेळले असून 58 विकेट्स घेतल्या आहेत.