BPS All Goa State Ranking Tennis Tournament 2023 :तेजस, तिथी यांना दुहेरी किताब

गोव्याचा अव्वल मानांकित पुरुष टेनिसपटू तेजस शेवडे याने पुरुष एकेरी व मिश्र दुहेरीत शानदार खेळ करताना बीपीएस अखिल गोवा राज्य मानांकन टेनिस स्पर्धेत विजेतेपदाची ‘डबल’ किमया साधली. ज्युनियर मुलींत दबदबा राखताना तिथी भूमकर हिने 14 वर्षांखालील व 18 वर्षांखालील मुलींत एकेरीत बाजी मारत दुहेरी किताब पटकावला.

स्पर्धेतील अंतिम सामने मडगाव येथील बीपीएस क्लब टेनिस कोर्टवर झाले. तेजसने पुरुष एकेरीतील अंतिम लढतीत एकही गेम न गमावता राजाराम कुंडईकर याचा 6-0, 6-0 असा धुव्वा उडविला.

राजाराम याची राज्य मानांकन पातळीवरील ही पहिलीच अंतिम लढत होती. तेजसने मिश्र दुहेरीत स्टॅनिया पेरिस हिच्या साथीत खेळताना अंतिम लढतीत जस्मीत सिंग व प्रणिता पेडणेकर जोडीस 6-1, 6-0 असे नमविले.

राजारामने पुरुष दुहेरीत जेतेपदाचा करंडक पटकावताना संतोष गोरावर याच्या साथीत प्रिन्स आग्नेल डिसिल्वा व संदेश सातार्डेकर जोडीस ६-३, ६-० असे हरविले. तिथी हिने १४ वर्षांखालील मुलींच्या एकेरीत आपली मैत्रीण विधी नाईक हिला पहिला सेट गमावल्यानंतर १-४, ४-२, ४-२ असे नमविले. या दोघींतच १८ वर्षांखालील वयोगटातील अंतिम लढत झाली. हा सामना एकतर्फी ठरवताना तिथी हिने ६-०, ६-२ असा विजय संपादन केला.

सिमरन, दर्श, पुनीत यांनाही जेतेपद

महिला एकेरीत सिमरन बुंदेला विजेती ठरली. अंतिम सामन्यात तिने प्रणिता पेडणेकर हिला ४-१, ४-१ असे नमविले. १४ वर्षांखालील मुलांच्या एकेरीत दर्श पै याने विजेतेपद प्राप्त केले. त्याने व्हिवान अगरवाल याला ४-०, ४-० असे लीलया हरविले. मात्र दर्श याला १८ वर्षांखालील मुलांच्या एकेरीत

उपविजेतेपदावर समाधान मानावे लागले. पुनीत फडते याने या वयोगटात बाजी मारताना ६-१, ६-० असा विजय झळकावला.