Delhi Capitals vs Royal Challengers Bangalore: रविवारी रॉयल चॅलेंजर्स बेंगलोर विरुद्ध दिल्ली कॅपिटल्स संघात वूमन प्रीमियर लीग 2023 मधील दुसरा सामना पार पडला. या सामन्यात दिल्लीने 60 धावांनी विजय मिळवला. पण याच सामन्यादरम्यान एका पोस्टरने सर्वांचेच लक्ष वेधले.
ब्रेबॉर्न स्टेडियमवर झालेल्या या सामन्यादरम्यान एका पुरुष प्रेक्षकाने एका भन्नाट विनंती करणारे पोस्टर झळकावले होते. त्याने पोस्टरवर लिहिले होते की 'प्रिय कॅमरामन, आयपीएलमध्ये मुलींना दाखवता, डब्ल्यूपीएलमध्ये तरी आम्हा मुलांना दाखवा.'
हे पोस्टर हातात घेतलेल्या या प्रेक्षकाचा फोटोही दिल्ली कॅपिटल्सने सोशल मीडियावर शेअर केला आहे. त्यांनी या फोटोला कॅप्शन दिले आहे की 'त्याचा संयम सुटत चालला आहे. पण हे मजेशीर आहे.'
दरम्यान, क्रिकेट चाहत्यांना हे नवीन नाही की आयपीएलदरम्यान अनेकदा सुंदर मुलींना कॅमेरामनकडून कॅमेरात कैद केले जाते. त्यामुळे त्यांचे अनेकदा फोटोही व्हायरल होत असतात. हीच गोष्ट लक्षात घेता रविवारी या प्रेक्षकाने डब्ल्यूपीएलमध्ये मुलांना दाखवण्याची विनंती करणारे पोस्टर झळकावले.
दरम्यान, त्याचे हे पोस्टर सध्या चांगलेच व्हायरल होत असून युजर्सकडून विविध प्रतिक्रियाही उमटत आहेत.
रविवारी झालेल्या सामन्यात बेंगलोरची कर्णधार स्मृती मानधनाने नाणेफेक जिंकून दिल्लीला प्रथम फलंदाजीसाठी आमंत्रित केले होते. याचा फायदा दिल्लीची कर्णधार मेग लेनिंग आणि शफाली वर्मा यांनी घेत अर्धशतके झळकावली. तसेच त्यांनी सलामीला 162 धावांची भागीदारीही रचली.
लेनिगने 43 चेंडूत 14 चौकारांसह 72 धावांची खेळी केली. तसेच शफालीने 45 चेंडूत 10 चौकार आणि 4 षटकारांसह 84 धावांची खेळी केली. त्याचबरोबर मॅरिझेन काप (39*) आणि जेमिमाह रोड्रिग्जने (22*) यांनी नाबाद 60 धावांची खेळी केली. त्यामुळे दिल्लीने प्रथम फलंदाजी करताना 20 षटकात 2 बाद 223 धावा केल्या. बेंगलोरकडून हिदर नाईट व्यतिरिक्त एकाही गोलंदाजाला विकेट घेता आली नाही.
बेंगलोरकडून 224 धावांच्या आव्हानाचा पाठलाग करताना कर्णधार स्मृती मानधनाने सर्वाधिक 35 धावा केल्या. तसेच एलिस पेरीने 31, हिदर नाईटने 34 आणि मेगन शटने नाबाद 30 धावांची खेळी केली. मात्र कोणालाही मोठी खेळी करत सामना जिंकवून देता आला नाही. बेंगलोरला 20 षटकात 8 बाद 163 धावाच करता आल्या. दिल्लीकडून तारा नॉरिसने सर्वाधिक 5 विकेट्स घेतल्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
