कोरोनाची लस विकसित करण्यासाठी 30 माकडांवर प्रयोग

Dainik Gomantak
बुधवार, 3 जून 2020

पुण्याच्या राष्ट्रीय विषाणू विज्ञान संस्थेकडे माकडे सुपूर्द करणार; वनमंत्री संजय राठोड यांची माहिती

मुंबई

कोरोना विषाणूमुळे होत असलेला प्रादुर्भाव टाळण्यासाठी एसएआरएस सीओव्ही 2 ही लस तत्काळ विकसित करण्यासाठी संशोधन हाती घेण्यात आले आहे. या संशोधन प्रकल्पासाठी पुण्याच्या राष्ट्रीय विषाणू विज्ञान संस्थेला 30 माकडांची आवश्‍यकता आहे. ही 30 माकडे राज्याच्या हद्दीतील घेण्यात येणार असून, कोरोना प्रतिबंधात्मक लसीचा सर्वप्रथम प्रयोग या माकडांवर करण्यात येईल. यासाठी 30 माकडे तत्काळ उपलब्ध करून देण्याचे निर्देश महाराष्टाचे वनमंत्री संजय राठोड यांनी दिले आहेत.
सध्या राज्यात कोरोना विषाणूमुळे होत असलेला प्रादुर्भाव व परिस्थितीचे गांभीर्य लक्षात घेता या प्रकल्पास तातडीने परवानगी देण्याबाबत राज्याचे प्रधान मुख्य वनसंरक्षक (वन्यजीव) यांनी 30 मे 2020 रोजीच्या पत्रान्वये सरकारला मान्यता देण्याची शिफारस केली आहे. त्यानुसार ही माकडे तत्काळ उपलब्ध करून देण्याचे निर्देश वनमंत्र्यांनी दिले.

अटी-शर्तींच्या अधीन राहून मान्यता
अनुभवी मनुष्यबळामार्फत या माकडांना पकडणे, त्यांना कुशलतेने हाताळणे, त्यांना सुरक्षितपणे बाळगणे, पकडलेल्या माकडांना, तसेच परिसरातील इतर वन्यप्राण्यांना इजा तसेच त्यांचा दैनंदिन जीवनक्रम विस्कळित न होऊ देणे, प्रकल्पाचा व्यापारी तत्त्वावर उपयोग न करणे आदी अटी-शर्तींच्या अधीन राहून ही मान्यता देण्यात आली आहे, अशी माहितीही वनमंत्र्यांनी दिली.
 

संबंधित बातम्या