मुंबईवर निसर्ग मेहेरबान

Dainik Gomantak
मंगळवार, 9 जून 2020

वाहतूक वाढूनही प्रदूषणात घट

मुंबई

निसर्ग चक्रीवादळाच्या प्रभावामुळे सोमवारीही मुंबई परिसरात समुद्रावरून नेहमीपेक्षा वेगाने वारे वाहत होते. त्यामुळे रस्त्यांवरील वाहतूक वाढली, तरी प्रदूषणाची पातळी वाढली नाही. परंतु, वाढलेल्या वाहतुकीचे परिणाम दोन-चार दिवसांत दिसू लागतील.
लॉकडाऊनच्या काळात मुंबईत रस्त्यांवर धावणाऱ्या वाहनांची संख्या नगण्य असल्याने हवेचा दर्जा चांगलाच सुधारला होता. सलग दोन महिने हवेतील प्रदूषकांचे प्रमाणात सरासरीच्या 30 टक्‍क्‍यांहून कमी झाले होते. मुंबईतील प्रत्येक घनमीटर हवेत तरंगत्या धूलिकणांचे (पीएम 2.5 ) प्रमाण 31 मे रोजी 37 मायक्रोग्रॅम होते. ते प्रमाण 8 जूनला 28 मायक्रोग्रॅम झाले. भारतीय उष्णकटिबंधीय संस्थेच्या 'सफर' उपक्रमांतर्गत ही पातळी नोंदवण्यात आली. माझगाव येथे पी.एम. 2.5 चे प्रमाण 31 मे रोजी 7 मायक्रोग्रॅम होते. हे आतापर्यतचे सर्वांत कमी प्रमाण असल्याची शक्‍यता आहे. सोमवारी हे प्रमाण 31 मायक्रोग्रॅमवर गेले. नवी मुंबईतील प्रदूषणाच्या पातळीत फक्त एक एककाने वाढ झाली आहे.
निसर्ग चक्रीवादळाच्या प्रभावामुळे मुंबई परिसरात समुद्राकडून वारे वाहत असल्याने त्यांचा वेग जास्त आहे. त्यामुळे हवेतील प्रदूषके वाहून जात आहेत, असे 'सफर'चे प्रकल्प संचालक डॉ. गुफरान बेग यांनी सांगितले. वाढलेल्या वाहतुकीचे परिणाम हवेतील गुणवत्तेवर दोन-तीन दिवसांत दिसू लागतील, असे ते म्हणाले. मुंबईत जूनमध्ये ताशी 18 ते 22 किलोमीटर वेगाने वारे वाहतात; सोमवारी त्यांचा वेग ताशी 24 किलोमीटर होता.

हवेतील पी.एम. 2.5 (प्रति घनमीटर मायक्रोग्रॅम)

ठिकाण                        31 मे           8 जून

मुंबई सरासरी                     37             28
भांडूप                              28            13
कुलाबा                            20             17
मालाड                             35             28
माझगाव                             7            31
वरळी                              31            13
बोरिवली                          52           31
बीकेसी                 अनुपलब्ध              50
चेंबूर                   अनुपलब्ध               15
अंधेरी                             35            33
नवी मुंबई                         19             20

संबंधित बातम्या