Amala Paul: दाक्षिणात्य अभिनेत्री अमला पॉल हीला 'या' कारणावरून नाकारला केरळमधील मंदिरात प्रवेश

Amala Paul: सुप्रसिद्ध दाक्षिणात्य अभिनेत्री अमला पॉलला केरळमधील एका हिंदू मंदिरात प्रवेश नाकारला गेला. केरळच्या एर्नाकुलममधील तिरूवैरानिकुलम येथील महादेव मंदिरात हा प्रकार घडला. या घटनेनंतर अमलाने मंदिर प्रशासनाने धार्मिक भेदभावाची वागणूक दिल्याची टीका केली आहे.

अमला पॉल सोमवारी या मंदिरात महादेव आणि इतर देवींच्या दर्शनासाठी गेली होती. पण मंदिर प्रशासनाने येथील प्रथा-परंपरांचा दाखला देत तिला मंदिरात प्रवेश नाकारला. या मंदिराच्या आवारात केवळ हिंदूंनाच परवानगी असल्याचे तिला सांगण्यात आले.

त्यामुळे इतर धर्मियांना मनाई केली जात असल्याचे सांगण्यात आले. त्यामुळे अमला हीला मंदिरासमोरील रस्त्यावरूनच देवीचे दर्शन घ्यावे लागले. तथापि, मंदिराच्या विझिटर्स बूकमध्ये अमलाने तिला आलेला हा अनुभव नोंदवला आहे.

तिने आपल्या अभिप्रायात म्हटले आहे की, देवीला पाहू शकले नाही पण लांबून तिची जाणीव झाली. 2023 मध्ये देखील धार्मिक भेदभाव अजूनही अस्तित्वात आहे, हे दुःखदायक आणि निराशाजनक आहे. मी देवतेच्या जवळ जाऊ शकले नाही परंतु दुरूनच मला आत्मा अनुभवता आला. मला आशा आहे की धार्मिक भेदभाव लवकरच बदल घडेल. भेदभाव राहणार नाही. एक वेळ अशी येईल, जेव्हा आपल्याला धर्माच्या आधारे नाही तर समान वागणूक मिळेल.

दरम्यान, हा प्रकार समोर आल्यापासून तिरुवैरानिकुलम महादेव मंदिर ट्रस्ट संचालित मंदिर प्रशासन चर्चेत आले आहे. मंदिर प्रशासन मात्र प्रोटोकॉलचे पालन करत असल्याचे म्हणत आहे. नेटकऱ्यांकडून या मंदिर प्रशासनावर टीका केली जात आहे.

केवळ धार्मिक कारणावरून मंदिर प्रशासनाचे असे वागणे अनेकांना खटकत आहे. दरम्यान, अमला ही दाक्षिणात्य चित्रपटसृष्टीतील आघाडीची अभिनेत्री आहे. गतवर्षात तिच्या 'कडावर' या सस्पेन्स थ्रिलर चित्रपटाने सर्वांनाच भुरळ घातली होती.